Desde a súa inauguración, en 1937, o museo municipal “Quiñones de León” é un espazo emblemático da cidade de Vigo. Nun grandioso pazo, casa típica da aristocracia galega, do século XVII e reformado no XIX; expóñense pezas de artes decorativas dos séculos XVIII, XIX e XX (mobiliario, cerámica, porcelana, miniaturas, pratería, reloxos, téxtiles, vidro, cristal, etc.); procedentes de adquisicións e doazóns, principalmente de D. Policarpo Sanz.

Na planta baixa presérvase o ambiente señorial da antiga residencia dos marqueses, doadores do pazo; xunto coa exposición permanente de pintura europea dos séculos XVII e XVIII (legado P. Sanz) e depósitos do Museo do Prado e do antigo Nacional de Arte Moderna.

A arte galega do século XX é a gran protagonista do museo ata o punto de considerarse no seu conxunto como a mellor colección pública neste campo. Nos andares primeiro e segundo atópanse exemplos de creación plástica galega contemporánea: o rexionalismo; a renovación dos anos 30; e a definitiva incorporación da arte galega ás tendencias actuais, experimentada na segunda metade do século XX.

Arqueoloxía ocupa unha gran sala completamente renovada en 2006 cunha exhibición permanente de materiais de Vigo e sur da provincia de Pontevedra que abranguen cronoloxicamente dende o período paleolítico ata a época romana. Destaca pola súa singularidade e importancia o conxunto de estelas funerarias tardorromanas.